A primitiva igrexa de Santa Uxía de Mougás debeu ser de estilo románico, como o testemuñan a cruz antefixa no seu cume e restos de labras decoradas, quizais aproveitadas, cando se levantou a actual edificación, posiblemente en 1698, data que aparece gravada nunha das columnas da igrexa. O templo, de planta rectangular, consta de tres naves con arcos de medio punto apoiados en sinxelas pilastras e ábsida cuadrangular. A nivel interior destacan os interesantes Retablos barrocos do século XVIII de indubidable valor artístico.