Sendeiro que, partindo do lugar coñecido como O Conchido, onde se localiza unha batería militar, bordea a costa por un dos espazos mellor conservados da Península do Grove e remata nas proximidades da urbanización turística de San Vicente do Grove.

Entre camiños de carros e sendas que atravesan praias pouco transitadas e salvaxes, ademais de non perder a vista do mar, toda a ruta está singularizada pola presenza de monumentais penedos graníticos que adoptan diferentes formas por mor da forte erosión do vento.

Ao longo da ruta pódense contemplar varios areais de pequenas dimensións como as praias de Con Negro, Aguieira ou da Poza, Barreiro e Castiñeira.

Achegándonos ao final do percorrido, atopamos o Lavadoiro da Castiñeira, que foi construído polos veciños a mediados do s. XX para aproveitar a auga do manancial existente nese lugar.