Museo creado en 1932 e inaugurado en 1934 no palacio provincial da Deputación de Lugo. Desde 1957 sitúase no antigo convento de San Francisco. Deste vello cenobio conserva a cociña, o refectorio (ambos do século XVIII) e o claustro (s. XV), enigmática construción declarada Ben de Interese Cultural en 1931. O edificio foi ampliado nas décadas dos anos setenta e noventa.

O Museo Provincial de Lugo conta con 29 salas expositivas dedicadas á prehistoria e arqueoloxía, á arte sacra, á etnografía, á cerámica e  vidro, á pintura e a escultura, a abanicos e reloxos, á epigrafía, á  plástica provincial romana ou á numismática e a medallística. Tamén mostra unha sección específica de arte galega: cerámica de Sargadelos, ourivaría e acibeche ademais de pintura, escultura, debuxo e gravado e 7 salas monográficas de creadores galegos contemporáneos. Así mesmo, expón fondos depositados polo Museo Nacional de Prado e polo Museo Nacional Centro  de Arte Reina Sofía. Recentemente incorporouse a sala Arte africana Xoán Anllo e remodelouse a nº 8 de ourivaría antiga cuxa colección está declarada como Ben de Interese Cultural de Galicia..