Principia no antigo camiño da Fraga a través dunha pista en moi bo estado que atravesa zonas agrarias e forestais. Ao longo do camiño visítanse catro muíños tradicionais, completamente restaurados, sinalizados con paneis e información sobre o seu valor patrimonial e etnográfico.
Na zona coñecida como O Telleiro hai unha derivación que leva ata Muíño da Ribeira.
Tras volver á ruta principal e pasar polo desvío cara a Queiroa de Abaixo tómase unha segunda derivación para visitar o Muíño de Queiroa, alimentado noutros tempos polo río Traveso.
Cerca de Soutelo, unha terceira derivación diríxese ao Muíño de Batán, situado nunha valga rematada polo Castro de Olas.
O último muíño restaurado que se pode visitar é o Muíño da Covela, ao que accederemos pola cuarta derivación desta ruta. Dende aquí empréndese camiño cara ás aldeas da Carballa e Leborís.
Cara o final da ruta, na área recreativa de Ponte Carballa xunto ao río Samo, atópase o Muíño Grande dos Baltares, en ruínas.