O monte de San Roque é un dos grandes espazos de lecer dos viveirenses. Situado a 353 metros de altitude, o seu miradoiro brinda unhas espléndidas vistas da contorna da ría de Viveiro, incluíndo a fermosa vila, os portos de Viveiro e Celeiro (un dos máis importantes do norte de Galicia) e a praia de Covas.

A desembocadura do río Landro, xa no mar Cantábrico, conforma unha ampla zona húmida de alto valor ecolóxico. No alto, a capela de San Roque vixía o mar e serve de referencia aos mariñeiros tal e como reza a tradicional cantiga Catro vellos mariñeiros: “Boga boga mariñeiro, imos para Viveiro, xa se ve San Roque”.