Capela de estilo Prerrománico levantada entre os séculos IX e X. Consta de dous corpos de planta lixeiramente trapezoidal: nave e cabeceira. Está construída en cachotería de lousa, con cuberta a dúas augas tamén de lousa. Dispón dunha única porta no muro sur, da que destaca o arco de ferradura realizado con laxas de lousa en posición de doelas, e de dúas pequenas ventás, unha na fachada principal de dobre arco e columna intermedia da que desapareceu a columna do parteluz, e outra na posterior. No interior, destaca o arco triunfal elíptico con lixeira tendencia á ferradura, e destacan as pinturas murais ao fresco, de influencia astur.