Construción de estilo neoclásico, pero con sucesivas reformas que practicamente ocultaron as súas características iniciais. Destaca sobre todo o contraste entre a súa alta torre e a modesta nave, esta de planta rectangular e presbiterio máis elevado que o resto do edificio. Porta de acceso, en lateral, con arco de medio punto e grandes doelas. Os ocos de iluminación e ventilación son rectangulares, con predominio da altura respecto á anchura.

Esta igrexa sitúase no núcleo de Córgomo, onde podemos observar tamén numerosos exemplos catalogados de arquitectura civil; na súa contorna existen ademais varios xacementos arqueolóxicos, restos de explotacións beneficiadas polos romanos na zona de Valdeorras.