A fachada da igrexa de San Xusto de Cabarcos está rematada por unha espadana de dúas plantas, con dous arcos de medio punto a inferior e un a superior, asía como unha escaleira de acceso a elas no lateral dereito da edificación. A súa construción remóntase a datas próximas ó ano 900 e foi restaurada no ano 1993.

A vista do seu interior debe facerse con calma, admirando todas as xoias artísticas que contén, entre as que se atopa o retablo barroco do altar principal realizado en madeira de castaño e adornado con columnas salomónicas e abundante decoración alegórica, que data de 1753, con imaxes do Apóstolo Santiago, San Xusto e Pastor (patróns da parroquia).