Da factoría Massó á praia de Liméns 

Mar infindo

O punto de inicio desta senda sitúase xunto á antiga fábrica Massó, onde se atopan os edificios xa en desuso da antiga factoría de salgadura, a conserveira e a factoría baleeira. 

Seguindo o sendeiro chegamos en primeiro lugar á lagoa de Congorza, onde viven ata 7 especies de patos e en cuxas árbores repousan a garza branca, a garza cincenta ou o picapeixe. Está situada dentro do Espazo Natural Punta Balea que conta cunha gran riqueza tanto de flora como de fauna e onde hai catalogadas máis de 400 especies de plantas, 140 aves diferentes e numerosas especies de insectos, anfibios e reptís. 

Dende aquí continuamos, bordeando a praia do Medio e a praia de Areamilla, dende onde podemos ascender á área de descanso do Outeiro para desfrutar das vistas sobre as Illas Cíes, que emerxen do océano para acompañarnos xa ao longo de todo o percorrido. 

Volvemos ao camiño ata chegar ás Furnas e, dende aquí, ata a praia do Porto para baixar despois cara aos areais de Santa Marta e Liméns onde finaliza o noso paseo. 

Nota: É necesario levar unha lanterna xa que, despois da praia de Areamilla, hai un tramo que discorre por un túnel que carece de iluminación.