Imos pasar tamén pola parte traseira de pequenos asteleiros chegando á praia do Pazo e de seguido ás ruinas do denominado castelo da Lúa, rodeado de lendas, que pertenceu á Orde do Temple, pasando despois á mitra compostelá, e consta que xa estaba arruinado a finais do século XVI. Está situado no esteiro do río Té que salvamos por unha ponte rematando o paseo na praia da Torre; con todo, aqueles que queiran continuar, poden seguir por un carreiro que se adentra entre a vexetación costeira e camiñar un par de quilómetros máis ata chegar á punta de Iñobre e ao peirao de Taragoña.