Este paseo bordea gran parte do encoro de Vilasouto, construído no ano 1969 sobre a conca do río Mao. 

Partindo da aldea de Eirexalba podemos coller a pista asfaltada que da a volta ao encoro ou ben seguir unha senda paralela que discorre máis próxima ao lago. Trátase dun paseo sinxelo, moi apropiado para facer con nenos, que conta con zonas de merendeiro e que, na súa última parte, nos ofrece un bosque no que atoparemos árbores moi variadas como castiñeiros, bidueiros, cerdeiras, freixos, ameneiros, chopos, salgueiros... 

É unha paraxe ideal para relaxarse ou practicar algún deporte como a pesca, autorizada durante todo o ano para a captura de determinadas especies.