Na súa parte inicial, ao chegar á presa de Cachón, percorre durante case 2 km unha canle hidráulica que foi construída a mediados do S. XX para desviar a auga do río e producir enerxía que abastecía as minas de estaño da Serra de Seixosa.
Tras finalizar o tramo da canle no lugar coñecido como a Bomba, no meandro do río Arnoia denominado Coto de Seoane, acométese un forte ascenso en dirección oeste, retomando o curso do río para contemplar os vestixios dos Muíños da Chancela na beira oposta ao sendeiro polo que transcorre o percorrido. Na aldea do Viso pódese visitar a pequena capela das Angustias antes de ascender por un estreito sendeiro entre valados e alcanzar as cotas altas da serra do Seixival; o final da ruta está no Santuario de Nosa Señora do Val.
Edificio barroco no antigo Camiño de Santiago que viña dende Porto e Celanova. Chaman a atención os restos do patio renacentista sen rematar onde se asenta o camposanto. Dende o santuario pódese volver a Escudeiros a través dunha pista de tres quilómetros de percorrido en dirección leste.