"O meu nome é Elia, a miña avoa chamoume así porque dicía que nacín co brillo do último raio do Sol, esta aventura tamén nace nese instante de luz, nese intre fuxidío imposible de reter.”

En tempos do imperio romano, cabo Fisterra era o punto final do mundo coñecido (Finis Terrae). Estritamente falando, por moi pouco esa zona non é a que está máis ao oeste da Europa continental, pero, malia iso, goza do privilexio de contemplar o derradeiro solpor do continente durante dous meses do ano.

A Costa da Morte representa a esencia de Galicia. A Galicia natural, das praias salvaxes e cantís de Fisterra, Camariñas ou Malpica; mais tamén dos penedos esculpidos polo vento en Traba (Laxe).