Turismo de Galicia

Deixamos Buño e saímos en dirección a Malpica. O traxecto, preto de 9,5 km, levaranos poucos minutos. Ao chegar a Malpica, dirixímonos ao porto, un bo lugar para respirar o ambiente mariñeiro e observar a curiosa morfoloxía do núcleo de poboación. As casas están penduradas das rochas, con vistas para o porto e as augas do Atlántico. Despois dun agradable paseo polas rúas estreitiñas da parte vella, dirixirémonos cara á parte alta. Desde alí gozaremos dunhas boas vistas.

Abandonamos Malpica e seguimos o noso camiño para nos achegar ao cabo San Adrián, situado a escasos 4 km. Nas súas inmediacións atópase o santuario de San Adrián do Mar. Cada mes de xuño, este enclave é escenario dunha romaría celebrada con gran devoción. A ela acoden incontables romeiros para solicitar ou, no seu caso, agradecer os favores do santo. O santuario constitúe un privilexiado miradoiro natural sobre Malpica e as Illas Sisargas, situadas xusto diante.

Desde alí baixamos de novo a Malpica e dirixímonos cara a Ponteceso, localidade situada a 13,2 km Transitaremos por unha estrada local que percorre as localidades de Beo, Mens, Cores e Nemeño. En Mens debemos deternos para ver o antigo castelo do mesmo nome. As Torres de Mens, que así se lle chama á fortaleza, foron construídas no século XIV e restauradas conservando gran parte da súa estrutura orixinal. O castelo está visible desde a estrada e non se permiten visitas do público, ao se tratar dunha propiedade privada. Pódese visitar a igrexa románica de Santiago, do século XII, próxima á torre. Mellor confirmar hora e dispoñibilidade chamando ao 981 714 588.

Minutos máis tarde chegamos a Ponteceso, berce do grande escritor galego Eduardo Pondal, un dos personaxes chave do Rexurdimento (renacemento da cultura e das letras galegas durante o século XIX). Ao pasear polas súas rúas e parques, atoparemos varias mostras da gratitude de Ponteceso cara ao seu fillo máis ilustre. Fóra xa da zona urbana, podemos subir ao Monte Branco, o accidente xeográfico máis emblemático desta comarca. Se tomamos a estrada que se dirixe á praia de Balarés, moi fermosa e situada a poucos quilómetros, divisamos na liña do ceo as poboacións de Laxe, O Porto de Corme, Cabana e o mesmo Ponteceso. Desde a cima poderemos gozar dunha espectacular perspectiva sobre o estuario formado polo río Anllóns no seu encontro co mar. É este un contorno natural que dá vida a numerosas especies, tanto vexetais como animais.

Continuando pola estrada AC-424, sen tomar o desvío cara á praia de Balarés, dirixímonos ao Porto de Corme, outra das típicas vilas mariñeiras destas terras. A pouca distancia, internándose nas perigosas augas do Océano Atlántico, atópase a Punta do Roncudo. Os percebes que nacen sobre as súas rochas son considerados os mellores de toda a costa galega. Mais, ademais do seu excepcional froito, os cantís do Roncudo son tamén coñecidos polo seu perigo. Moitos percebeiros atoparon a morte neste agreste cabo. En memoria destas persoas, fóronse plantando co paso dos anos numerosas cruces sobre as rochas.

O Porto de Corme atópase situado a uns 8 km de Ponteceso. Antes de chegar, na cima do monte, podemos ver un monumento á Virxe do Faro. Desde este punto, teremos unha vista inmellorable para toda a liña de costa. Moi preto da capela atópase un gran monumento a modo de faro.

Desde Corme volvemos a Ponteceso pola mesma estrada. Desde Ponteceso, percorremos 8,4 km ata a localidade de Borneiro. No seu contorno, atópanse o castro da Cibdá e o famoso dolmen de Dombate, dous conxuntos arqueolóxicos que figuran entre os más valiosos de Galicia. Este último está situado a poucos metros da estrada, tomando un desvío á dereita. Recentemente o dolmen foi protexido cun atractivo edificio de madeira e cristal que axuda a unha mellor visualización do monumento, así como un centro de interpretación para unha mellor comprensión do megalitismo na Costa da Morte.

Desde Borneiro, unha ruta de ida e volta achéganos ás Torres do Allo, a poucos quilómetros de Baio, na aldea do Allo. Un pazo do S. XVI, un centro de interpretación e unha oportunidade magnífica de coñecer máis datos sobre A Costa da Morte, por unha banda, e da vida pacega na Galicia rural. Sen esquecer a igrexa de San Pedro, un curioso cemiterio e tres hórreos magníficos coa tipoloxía construtiva da zona.

Volvemos sobre os nosos pasos ata a localidade de Cabana, desde onde nos diriximos a Laxe. Esta vila mariñeira ofrece unha fermosa praia de augas tranquilas, perfecta para o baño dos máis pequenos. O longo areal de case un quilómetro e medio chega ate o mesmo centro da vila. Respecto  ao seu patrimonio cultural, conta cunha igrexa románica e cunha capela, en honor a Santa Rosa de Lima, situada no cumio dun monte. Nas inmediacións de Laxe hai que achegarse á fermosa praia salvaxe de Soesto. De Ponteceso a Laxe hai 11,5 km pola AC- 431.

Volvemos á estrada que nos traía desde Laxe e seguimos en dirección á Ponte do Porto. Ao chegar a esta localidade, cruzaremos a ponte sobre o río Grande para achegarnos a Porto de Cereixo e visitar o agradable conxunto das Torres de Cereixo e a igrexa de Santiago, construída no século XII.

Máis tarde partimos para Camelle, pequena poboación situada a uns 5 km. Alí atópase a denominada Casa-Museo de Man. Manfred foi un alemán que viviu durante décadas en plena sintonía coa natureza galega. A carón do mar, foi reunindo esculturas realizadas por el mesmo a partir de diversos materiais, dispostas en todo tipo de formas e pintadas doutras tantas cores.

A partir deste punto, temos dúas opcións. A primeira delas é volver á Ponte do Porto e desde alí dirixírmonos a Camariñas e Cabo Vilán. A segunda é percorrer uns 18 km, bordeando a costa pola aldea de Arou a través dunha pista de terra que nos conducirá primeiro a Cabo Vilán e despois a Camariñas. Este último traxecto só se poderá realizar se dispomos dun vehículo axeitado. Un todoterreo é a opción máis recomendable. De nos decidir por esta segunda posibilidade, poderemos visitar a enseada de Trece co cemiterio dos Ingleses e o Foxo do Lobo, antes de chegar a Cabo Vilán e gozar dunhas magníficas vistas da costa.

Sexa como for, faremos unha pequena parada en Camariñas. Esta localidade é berce dun prestixioso encaixe de palillos, realizado desde hai séculos polas palilleiras locais. Alén do valor das pezas, asistir ao traballo das artesás e ver os seus dedos manexar habilmente os fíos ao ritmo do seu son característico é un espectáculo en si mesmo.

O noso seguinte destino é Muxía, situada a 22,4 km Para chegar a ela hai que coller un desvío á dereita na localidade de Berdoias, onde accederemos á AC-440. Antes de chegar a Muxía pasamos polo lugar de Ozón, que forma parte do Camiño de Santiago. A reitoral da igrexa románica de San Martiño de Ozón conta co hórreo máis grande da zona, só superado en toda Galicia polos de Araño, Lira e Carnota.

Deixando atrás Ozón atopámonos coa reitoral de Moraime, construída sobre os restos dun antigo mosteiro, que albergará proximamente un Hotel Monumento. A súa igrexa ten un bo estado de conservación e pode ser visitada en horario de culto.

Desde aquí xa quedan poucos quilómetros para chegar á vila de Muxía. O punto de maior interese desta localidade (case habería que dicir parada obrigada) é o santuario da Virxe da Barca e as famosas pedras milagreiras.

Volveremos a Berdoias pola AC-440 e desde alí seguiremos cara a Corcubión, punto ao que chegaremos tras percorrer 18,7 km. Entre os atractivos desta localidade figuran a igrexa parroquial de San Marcos, o castelo do Cardeal e o Pazo dos Condes de Altamira.

De Corcubión dirixirémonos a Fisterra, percorrendo 11,8 km pola AC-445. Fisterra posúe todo o magnetismo dun dos lugares míticos da antigüidade. Os poboadores de Europa vían neste punto a fin da terra coñecida, a porta cara ao Máis Alá. A imaxe do sol ao poñerse sobre as augas do Océano Atlántico aterraba e fascinaba por igual a toda persoa que se achegara a este extremo occidental do continente. Certamente, os rochosos cantís que rodean Fisterra, en loita constante coas augas do océano, non facían senón contribuír a alimentar a aura lendaria deste lugar. No cabo, a uns 3 km da vila, está o faro aberto ao público. Estamos no mítico lugar ao que chegaban os peregrinos que viñan polo Camiño de Santiago para queimar as súas pertenzas persoais.

Nesta localidade podemos coñecer tamén o Santo Cristo de Fisterra, imaxe que se encontra na igrexa de Santa María das Areas, construída no século XII. Esta igrexa atópase á dereita da estrada, xusto onde comeza a subida ao faro. É posible acceder ao seu interior en horario de 10 a 14 e de 16 a 19 horas, durante os meses de verán, e en horario de culto durante os meses de inverno.

Poderemos deternos tamén no porto da vila e dar un pequeno paseo ata o castelo de San Carlos. Tampouco debemos pasar por alto as numerosas e bonitas praias existentes na zona, como Mar de Fóra, Langosteira, O Rostro...

Na localidade de Fisterra damos por finalizada a nosa ruta pola Costa da Morte.