Turismo de Galicia

Puntos clave da ruta:

1. O camiño iníciase no punto no que o pequeno río da Gándara desemboca na ría (1). Alí habemos poder ver, dependendo da época do ano e das mareas, un gran grupo de gaivotas patiamarelas e choronas, así como, frecuentemente, garzotas pequenas.
2. Na Xunqueira de Alba (2), onde existen algúns observatorios ornitolóxicos, é posible observar lavandeira amarela, lavanco, garza real ou bico de coral e oír os fuxidíos rascóns comúns.
3. Xa contra o final da ruta, habemos encontrar unha pequena charca (3) xusto ao lado da estrada, na que podemos ver mergullóns pequenos e galiñolas de auga. No inverno son moi frecuentes neste punto os picafollas europeos.

Puntos clave da ruta:

1. Na illa das Esculturas (1) debemos estar atentos aos lavancos e ás gaivotas, xa que, ademais da gaivota patiamarela, podemos ver diferentes especies como a escura ou a chorona, así como o gaivotón. Na ría (2) é frecuente o picapeixes.
2. Polo río (3) imos poder ver corvos mariños grandes e, de novo, diferentes especies de gaivotas.
3. O peirao das Corbaceiras (4) tamén é un bo lugar para ver garzas reais.
4. Ata o final do paseo son frecuentes lavancos, gaivotas, corvos mariños grandes, garzas reais e garzotas pequenas, entre outras especies.

Puntos clave da ruta:

1. Desde o peirao de Besada (1) é posible observar abondosas gaivotas de varias especies, así como garzas reaiss, garzotas pequenas, corvos mariños grandes e limícolas como o mazarico real ou o pilro común, dependendo da época do ano.
2. Na enseada (2) e a praia de Lourido (3) pódense observar tamén diferentes especies de gaivotas.
3. O itinerario lévanos a unha pequena enseada onde hai un illote chamado dos Ratos (4). Trátase dun bo repousadoiro para garzas reais, garzotas pequenas, gaivotas de diferentes especies, incluso algunha pouco frecuente como a gaivota polar, e, ocasionalmente, cullereiro común.