Construción orixinal do s.XVI; hoxe en ruínas, aínda que se integra nun conxunto arquitectónico e etnográfico de grande interese.
Trátase dun volume cúbico de dúas plantas, cun aspecto robusto debido ao emprego austero do granito en forma de grandes pezas de cantería. A fachada principal é a que centra todo o interese compositivo, xa que o conxunto caracterízase pola falta de aberturas nos parámetros verticais.
A porta de entrada aparece lixeiramente desprazada do centro e sobre ela colócase unha fiestra con lintel moldurado e con decoración a base de bólas. Ao seu carón outra fiestra, esta de dobre arquivolta, que arranca dun lintel recto, tendo a mesma decoración que a anterior. Entre elas, un tríptico labrado na pedra que representa tres figuras de animais.