Turismo de Galicia

Puntos clave da ruta:

1. Desde as inmediacións da central térmica de Meirama (1) tómase un camiño ao sur, arrodeando a entulleira exterior da mina de lignito. Nesta zona imos poder ver perdices rubias e tartarañas cincentas.
2. Seguindo este camiño durante uns dous quilómetros accédese á presa de Vilasenín (2), desde onde é doado observar o mergullón cristado, o millafre negro e o picafollas ibérico.
3. Seguindo pola estrada cara ao suroeste, a zona de matogueira (3) pode ofrecer a posibilidade de detectar o picanzo vermello, a papuxa do mato e a escribenta amarela.
4. Gañamos altura e imos chegar á Areosa (Danigal). Desde alí, tomando unha pista á dereita despois do alto (4), poderemos achegarnos a unha zona de concentración de milleiros de gaivotas, millafres negros, corvos grandes e, ocasionalmente, cegoñas branca.
5. Descendendo, seguimos recto no cruce coa AC-413 e aproximámonos ao encoro de Vilagudín por unha zona de prados (5). Aquí é posible avistar a tartaraña cincenta, o millafre negro, o picanzo vermello e o corvo grande.
6. Unha vez na presa do encoro (6), poderemos rexistrar o mergullón cristado e a andoriña dos penedos.
7. Despois de atravesar a presa, viramos á dereita bordeando o encoro (7) para observar o picafollas ibérico e diversas gaivotas.
8. O camiño chega á aldea de Arcai de Abaixo (8), na que se observan escribentas amarelas e, en inverno, galiñolas negras.