Da beleza paisaxística e monumental do Barco de Valdeorras trasladámonos ao concello da Rúa, onde se concentra o maior número de adegas desta denominación.

A comarca de Valdeorras é unha zona de gran contraste xeográfico. Combina a súa proximidade a Pena Trevinca, coñecida como “o teito de Galicia”, coas súas profundas concas fluviais, polas que discorre o río Sil e os seus afluentes.

Na súa terra vermella e arxilosa a vide séntese cómoda. A lousa non só adorna os tellados de edificacións tradicionais, senón que compón un solo apto para a maduración da uva. Esta, convertida en viño, bótase a durmir baixo a terra, nas mesmas covas que escavaban os romanos hai séculos buscando ouro.

Máis información...
- Pazo do Castro. www.pazodocastro.com
- Adega Alán del Val. www.alandeval.com
- Adega Joaquín Rebolledo. www.joaquinrebolledo.com
- Adega de A Coroa. www.acoroa.com
- Adega Godeval. www.godeval.com

Día 1º

Retallos de historia medieval

Propoñémosvos unha ruta pola comarca e o Val de Valdeorras, modelado polo paso do río Sil entre montañas. A localidade do Barco de Valdeorras preséntase como punto estratéxico para explorar esta terra. Recomendámosvos chegar ao aloxamento elixido a primeira hora da tarde. A oferta hoteleira é variada, tanto na propia vila como nas súas parroquias.

Lembra que pode haber recursos que non estean xeorreferenciados e, polo tanto, non os esteas visualizando.

Da tradición dos pazos aos tratamentos de viñoterapia

Hoteis, casas e pazos gardan retallos da historia medieval desta cidade, polo que merecen unha visita. É o caso do Pazo dos Flórez ou Pazo do Castro, convertido en hotel. Está situado no lugar coñecido como Vila do Castro, a cinco minutos do centro, na parte alta do Barco de Valdeorras. Dende aquí ofrécese unha ampla vista sobre a chaira na que se asenta esta gran poboación. En 1630 D. Pedro Losada e Quiroga mandouno construír para fundar o seu morgado regular.

Chama a atención o seu aspecto orixinal, diferente ao resto dos pazos galegos. Recíbenos a súa fachada con seis arcos de pedra vermella do país sobre un amplo soportal e os seus tellados cubertos de lousa, sinal de identidade da comarca, cuxa actividade económica xira arredor da súa extracción. Declarado edificio histórico-artístico xunto coa súa capela, foi habilitado como hotel-monumento de catro estrelas. No seu interior conserva o mobiliario, a decoración e obras de arte orixinais. Curioseade no seu contorno e descubriredes nunha palleira anexa un pequeno museo de carruaxes e aparellos de montar.

Se chegáchedes cedo poderedes aproveitar e engadirlle á tarde un pouco de relax no spa do pazo. Envolvementos ou masaxes en aceites extraídos da uva son algúns dos tratamentos de viñoterapia que nesta zona integran a proposta arredor do amplo mundo do viño e a súa cultura.

O botelo, as castañas e os cogomelos predominan nos menús do territorio

E, para cear, a oferta de restauración é moi ampla. Ante o menú lembrade o refrán que escoitaredes aquí: “Do mar, o mero; do Barco, o botelo”. O botelo é un elaborado da matanza do porco, todo un agasallo para o padal. Outros produtos recoñecidos da zona son as castañas, que están a ocupar un posto de honra na cociña actual de Valdeorras, xunto coa gran riqueza micolóxica dos seus montes. Na copa encaixarán á perfección tanto un tinto de mencía como un branco de godello, da Denominación de Orixe Valdeorras..

Día 2º

De adegas na Rúa

A mañá dedicarémola a coñecer a fondo os viños da Denominación de Orixe Valdeorras, da man dos seus adegueiros, nos propios viñedos.

Lembra que pode haber recursos que non estean xeorreferenciados e, polo tanto, non os esteas visualizando.

Desprazarémonos en coche ata o veciño concello da Rúa, onde se sitúa o maior número de adegas adscritas á denominación. Seguimos a N-120 e logo o desvío indicado á localidade. No cuarto de hora aproximado de traxecto, a súa beleza vai revelándose ante nós. O curso encaixado do Sil que viñamos seguindo ensánchase aquí de tal maneira que forma aos pés da Rúa o encoro de San Martiño, espazo de gran valor natural pola súa flora e fauna e cuxo interior contén varias illas.

Os adegueiros móstrannos os segredos dos seus caldos

Son moitas as adegas da zona que merecen a nosa atención pola súa gran singularidade, así que dedicaremos boa parte do día a visitalas e conversar cos adegueiros sobre as variedades, o cultivo da viña, a poda, a vendima, a elaboración, o clima, os solos ou calquera aspecto que desexemos coñecer sobre o vínculo desta terra co viño.

Pola mañá poderemos acompañar aos adegueiros de Alán del Val ata a finca A Costiña, para ver as cepas de brancellao, orientadas ao sur nun terreo cunha marcada pendente. Baixo este solo de lousa, que facilita a permeabilidade e a absorción da calor solar, a maduración da uva será a idónea. Así é como esta adega elabora un viño exclusivo de parcela, con botellas numeradas que acaban nas mesas dos mellores restaurantes.

Máis tarde descenderemos ata a cova-adega denominada “A Mina”, construída no século XVIII e restaurada respectando todos os seus elementos estruturais. É aquí onde a Adega Joaquín Rebolledo madura os viños de crianza dun xeito natural, afastados do ruído e a unha temperatura e humidade sempre constantes. Nestas habitacións de pedra baixo a terra permanecen as barricas ata que os enólogos consideran que é o momento ideal para que os seus caldos saian ao mercado.

Os restaurantes da Rúa non descoidan os produtos típicos da zona como o botelo ou a androlla, a empanada de costelas, as anguías de río, o cabrito asado ou as carnes de caza.

Unha adega asentada sobre un antigo castro romano

Despois de xantar podemos subir ata o monte da Coroa, onde se asentaba un antiguo castro romano e hoxe faino a adega do mesmo nome. Os seus propietarios reconstruírona sobre unha edificación de máis de 300 anos de antigüidade, empregando só materiais autóctonos como lousa, pedra, madeira e barro.

Os ollos escaparánsenos de inmediato cara a unha pequena construción circular de pedras irregulares coroada por unha cheminea. Trátase do respiradoiro que usa a cova, oculta baixo os seus pés. Aquí ten lugar o proceso de fermentación deste ouro líquido que é o godello. A maxia e misterio do lugar aumentará ao coñecer que a 300 metros ao norte os romanos escavaban esta montaña para obter ouro e que a 200 metros ao sur cruzaba a Vía Nova, calzada romana número XVIII no Itinerario de Antonino, que comunicaba Astorga coa cidade portuguesa de Braga.

Un paseo pola natureza

Se ao rematar o percorrido cos adegueiros aínda non é moi tarde, aconsellámosvos pasear polo espazo verde do Aguillón, que rodea o encoro de San Martiño por toda a marxe dereita do río Sil ao seu paso pola Rúa. É o balcón perfecto para observar as aves que veñen aniñar aquí. Entre elas téñense rexistrado máis dunha ducia de familias distintas de patos.

Para cando sexa a hora de cear, se decidides facelo na Rúa, o codillo de porco é unha das especialidades polas que se distingue o concello, que exalta este prato nunha feira gastronómica anual.

Día 3º

Dos templos románicos ás modernas tecnoloxías de elaboración do viño

Antes de iniciar o regreso podedes dar un último paseo ata o Mosteiro de Xagoaza, que na súa orixe foi priorado dos cabaleiros Templarios, e a igrexa de San Miguel, onde na parte superior se distingue unha Cruz de Malta labrada na pedra.

Lembra que pode haber recursos que non estean xeorreferenciados e, polo tanto, non os esteas visualizando.

En pouco máis de media hora dende o centro do Barco de Valdeorras alcánzase este fermoso conxunto medieval dos séculos XII e XIII, que trala súa restauración alberga as modernas instalacións da Adega Godeval, que podemos visitar. A arquitectura románica destas construcións e un contorno natural case virxe transportarannos a un tempo pasado. Pola contra, o interior da adega incorpora as máis modernas tecnoloxías para elaborar un viño monovarietal de godello ao amparo da Denominación de Orixe.

Xunta de Galicia

© 2016 Turismo de Galicia | Todos os dereitos reservados
Política de privacidade | Contacto | Accesibilidade

Galicia
Arriba