O Ribeiro está situado na parte máis occidental da provincia ourensá, na confluencia dos vales dos ríos Miño, Avia, Arnoia e Barbantiño. É este enclave o que singulariza estas terras e confírenlle unha notable beleza paisaxística.

Ruta do Viño do Ribeiro
Concello de Ribadavia
Praza Maior s/n
32400 Ribadavia
Tf:   988477100
Fax: 988477101
www.rutadelvinoribeiro.com
ruta@rutadelvinoribeiro.com

Lembra que pode haber recursos que non estean xeorreferenciados e, polo tanto, non os esteas visualizando.

Este territorio, considerado como un dos enclaves máis representativos da arquitectura galega, atesoura un patrimonio artístico magníficamente conservado. Nos seus pobos medievais pódense visitar castros, xuderías (Ribadavia, coa súa Festa da Istoria no mes de agosto), pazos (Pazos de Arenteiro), mosteiros e igrexas integrados á perfección coa paisaxe da auga e o viño. 

As épocas castrexa, románica, barroca ou moderna, conxúganse no Ribeiro entre a nobreza do seu granito e espiritualidade da cultura. Os recursos da Ruta do Viño do Ribeiro ofrecen un amplo abano de posibilidades para gozar da visita.

As rutas de sendeirismo permítennos coñecer Monumentos Naturais como Pena Corneira, ou admirar a riqueza patrimonial que os diferentes estilos arquitectónicos nos deixaron. Podemos gozar practicando deportes naúticos, pasear en catamarán entre viñedos ou relaxarnos e aproveitar as beneficiosas propiedades das augas termais.

Produción, historia e variedades

O Ribeiro foi moi activo desde tempos antigos, proba diso é a existencia de vías romanas, restos de minas, lavadoiros de ouro, etc.; as primeiras citas documentais que a definen como rexión diferenciada datan do ano 928. Desde a Idade Media, esta terra e as súas xentes estiveron intimamente unidas ao cultivo da vide e á produción dos seus característicos viños, sendo a principal referencia vinícola dos reinos cristiáns desde o século IX ata o século XVII.

A D.O. conta cunha extensión de aproximadamente 2.700 hectáreas de viñedo situadas nos municipios de Ribadavia, Arnoia, Castrelo de Miño, Carballeda de Avia, Leiro, Cenlle, Beade, Punxín e Cortegada, e parte dos de Boborás, San Amaro, Toén, Carballiño, Ourense. O viñedo esténdese desde os 75 ata os 400 metros de altitude en vales e ladeiras ás veces de acusada pendente que é salvada polas terrazas, aquí denominadas socalcos ou bocarribeiras, que seguen as curvas de nivel.

Cun clima de influencia atlántica, de temperaturas suaves e unha notable pluviometría, cultívanse preferentemente uvas brancas como a Treixadura, seguida de Loureira, Torrontés, Albariño, Albilla, Godello e as foráneas Macabeo e Palomino. En tintas a preferente é a Caiño, complementadas pola Ferrón, Sousón, Brancellao, Mencía, Garnacha e Tempranillo. As vides elévanse para que o froito non esté en contacto co chan. O viño branco do Ribeiro é un viño limpo e transparente, sutil no olfacto, con exquisitos aromas de flores e froitas; os tintos son vivos, con tons brillantes de vermello picota, intensos en nariz e amplos e expresivos en boca.

Arriba