Ao leste da Mariña de Lugo atopamos dúas rías de características diferentes, excepcionais sobre todo en outono e inverno; se o tempo é frío no norte e centro de Europa, as aves poden contarse por milleiros. 

Dúas rías con centos de aves

Durante a migración outonal son moitas as especies que recalan en ambas as rías e que han deleitar os observadores esixentes. O recortado tramo de costa que existe entre as dúas vainos deparar aínda máis observacións de interese. A ría de Ribadeo, compartida coa veciña Asturias, é unha grande entrada perpendicular á costa que penetra na terra ata o esteiro do río Eo; pola súa banda, a de Foz é de menor tamaño pero máis aberta.

Destacan nelas as grandes extensións de lamas intermareais que poden alimentar unha gran cantidade e variedade de aves, pois sobre elas vive a Zoostera, unha planta mariña con aspecto de prado, extraordinariamente rica. Entre ambas as rías encontramos unha costa moi recortada na que as praias e os cantís se alternan nunha sucesión continua. A máis famosa destas praias é sen dúbida a das Catedrais. Trátase dun tramo moi apropiado para a observación de aves en migración e estadía invernal.

Os roteiros
Lembra que pode haber recursos que non estean xeorreferenciados e, polo tanto, non os esteas visualizando.

Roteiro en coche ou bicicleta “Acuta”

MELLOR ÉPOCA

Entre novembro e a primeira quincena de febreiro

DISTANCIA

13 Km

DURACIÓN

3 horas en coche, 5 horas en bicicleta

DIFICULTADE

Ningunha

CONCELLOS

Ribadeo

PERCORRIDO

Ría de Ribadeo

Lembra que pode haber recursos que non estean xeorreferenciados e, polo tanto, non os esteas visualizando.

Puntos clave da ruta:

  1. Partimos do Porto de Abaixo (1), ao fondo da ría, onde podemos observar o picapeixes na zona das xunqueiras.
  2. Seguimos a estrada en dirección norte e facemos paradas para observar a ría. Un excelente punto é xusto onde finaliza a xunqueira e comezan as grandes superficies de limo intermareal (2): poderemos observar milleiros de anátidos entre os que destacan os pato rabilongo, pato asubiadorsD, chupón e cristado. Cómpre que tamén esteamos atentos aos pouco comúns patos bastardos e aos gansos de cara negra. Tamén poderemos observar corvos mariños grande, mazaricos reais, garzas, garzotas e, cun pouco de sorte, a sempre sorprendente aguia pescadora.
  3. Conforme a ría se vai abrindo imos atopar novas especies, como o mergullón de pescozo negro, de particular interese no tramo previo á vila de Ribadeo (3).
  4. Atentos ás augas que rodean o seu porto (4), pois podemos observar especies tan atractivas como a mobella grande.
  5. Desde alí dirixímonos cara á contorna da illa Pancha (6), pasando por áreas de cultivo nas que habemos observar algunhas aves como a carriza dos xuncos ou o lagarteiro común.

Roteiro en coche ou bicicleta “Arquata”

MELLOR ÉPOCA

De agosto a febreiro

DISTANCIA

13 km

DURACIÓN

2 horas en coche, 4 horas en bicicleta

DIFICULTADE

Ningunha

CONCELLOS

Barreiros, Foz

PERCORRIDO

Ría de Foz

Lembra que pode haber recursos que non estean xeorreferenciados e, polo tanto, non os esteas visualizando.

Puntos clave da ruta:

  1. Desde a praia da Anguieira (1), ao leste da boca da ría, partimos en dirección sur bordeando a ría. Habemos estar atentos ás mobellas grandes en mar aberto (2) e ao paso de mascato do atlántico.
  2. Nos arredores do pequeno lugar de Viladaíde (3) poderemos achegarnos á ría para observar limícolas como o pilro común, a píllara real ou o mazarico real. Garzas reais e garzotas completan o elenco.
  3. Tras cruzar a ría cómpre que esteamos atentos ao fondo desta (4), onde se poden ver numerosos anátidos a ambas as beiras da vía do tren. Desde agosto ata outubro, aproximadamente, este é un bo lugar tamén para observar cullereiros comúns.
  4. A continuación achegámonos á punta da Arnela (5), que nos sitúa practicamente no medio da ría. Desde aquí é doado avistar a maior parte das especies de aves presentes.
  5. Desde o porto de Foz (6) poderemos observar comodamente numerosos bandos de gaivotas patiamarelas, escuras e choronas, canda garzas reais e gabitas comúns.
  6. Finalizamos na praia da Rapadoira (7), que pecha a ría, e nos illotes que encontramos, onde nidifican as gaivotas patiamarelas. É posible ver tamén a mobella grande, o corvo mariño grande e incluso o pilro gordo.

Roteiro a pé ou bicicleta “Petrosus”

MELLOR ÉPOCA

De agosto a maio

DISTANCIA

7 km

DURACIÓN

3 horas a pé, 2 horas en bicicleta

DIFICULTADE

Ningunha

CONCELLOS

Ribadeo

PERCORRIDO

Faro de Ribadeo - Punta dos Corvos (Rinlo)

Lembra que pode haber recursos que non estean xeorreferenciados e, polo tanto, non os esteas visualizando.

Puntos clave da ruta:

  1. Partimos das proximidades da illa Pancha, na boca da ría de Ribadeo (1), onde podemos observar especies ligadas a medios agrícolas como son as lavandeiras amarelas, por primavera, ou a carriza dos xuncos e o lagarteiro común.
  2. Atención a todos os campos que bordean o mar (2), pois no outono e no inverno pódese contemplar neles o esmerillón.
  3. Nas inmediacións de Rinlo (3) hai invernos nos que se detecta a rara e fermosa escribenta das neves. Habémonos fixar nas picas, xa que algunhas delas han ser costeiras.
  4. Antes de chegar a Rinlo atopamos balsas artificiais (4), en ocasións con bastante auga, onde se congregan gaivotas de diferentes especies e incluso limícolas en migración.
  5. Finalizamos na Punta dos Corvos (5), onde poderemos observar precisamente corvos mariños grandes. Atendemos tamén ao mar aberto e ao paso de mascatos do Atlántico e outras aves mariñas como os carráns cristados e os comúns e mais os pentumeiros comúns.
As aves

As rías de Ribadeo e Foz acollen durante o inverno centos de aves acuáticas. Destaca a presenza de diferentes anátidos como os patos rabilongos, patos asubiadores, cristados e chupóns. Son abundantes as garzas reais e as garzotas pequenas, os corvos mariños grandes e limícolas como os mazaricos reais ou gaivotas de diferentes especies. Tamén podemos observar outras especies menos comúns, como o mergullón de pescozo negro, o ganso de cara negra ou o pato bastardo.

En mar aberto é frecuente o paso de aves mariñas como o mascato do atlántico ou o pentumeiro común. Na costa rochosa ocasionalmente podemos rexistrar a presenza de escribentas das neves.

Consellos e recursos
  • Os mellores momentos para realizar avistamentos son cando sobe a marea ou cando comeza a baixar. Daquela cómpre que evitemos a marea chea e a marea baixa, xa que neses momentos a observación nas rías é máis complicada. 

  • Especialmente na ría de Ribadeo, a primeira hora da mañá imos ter o sol de fronte, polo que habemos obter mellores observacións conforme nos achegamos ao mediodía. 

  • É aconsellable o uso do telescopio en ambas as rías. 

  • Transitar só polos camiños, tendo conta de non invadir as leiras.
     

Arriba