Moi preto da cidade de Ferrol existe un tramo de costa agreste cunha gran cantidade de aves. San Xurxo, Prior, Santa Comba, A Frouxeira e Cedeira son algúns dos destinos máis atractivos para as aves e apetecibles para o observador. Aproveitaremos as primeiras horas do día para quitarlle todo o partido á riqueza ornitolóxica deste singular recuncho do extremo norte de Galicia.

Aves arredor da cidade

A sinuosa costa entre Caranza (Ferrol) e a ría de Cedeira garda espazos naturais como a lagoa da Frouxeira —refuxio de miles de aves acuáticas no inverno— e diferentes chairas costeiras e praias en Doniños, San Xurxo, Ponzos, A Frouxeira, Pantín e Vilarube. En todas estas praias existen zonas húmidas próximas nas que adoita haber algún canaval ou salgueiral. A parte rochosa corresponde cos cantís de Prioriño, Prior, as illas Gabeiras e os illotes próximos e as puntas Forcadas e Candieira.

Moitos destes sitios son zonas de cría de aves mariñas e todos son atalaias privilexiadas para a observación da migración. O encoro das Forcadas (ao sur de Vilarrube) e a Ría de Cedeira complementan a lista de lugares de interese para o noso paseo ornitolóxico.

Os roteiros
Lembra que pode haber recursos que non estean xeorreferenciados e, polo tanto, non os esteas visualizando.

Roteiro en coche: Faro da Frouxeira - Valdoviño

MELLOR ÉPOCA

Entre agosto e decembro

DISTANCIA

39 Km

DURACIÓN

3 horas

DIFICULTADE

Ningunha

CONCELLOS

Valdoviño

PERCORRIDO

Faro da Frouxeira - Taraza - Lagoa da Frouxeira (sur) - Valdoviño - Loira - Encoro das Forcadas - Vilaboa - praia de Vilarrube - Pantín - Valdoviño

Lembra que pode haber recursos que non estean xeorreferenciados e, polo tanto, non os esteas visualizando.

Puntos clave da ruta

  1. A ruta comeza no faro da Frouxeira (1), no que se observa pedreiro cincento, choia de bico vermello e corvo grande. Máis cara ao sur vense os campos de Taraza (2), nos que é posible localizar o chasco norteño, a folosa manchada e o picanzo vermello.
  2. Desde o observatorio ornitolóxico da Frouxeira (3), con algo de sorte, poderemos ver abetouros, cullereiros e escribentas das canaveiras, ademais de centos de anátidas.
  3. En Pazos (4) é ocasional o pimpín do norte en inverno e o miñato abelleiro europeo no verán.
  4. Máis cara ao interior, o encoro das Forcadas ofrécenos a oportunidade de observar, no inverno, pimpíns do norte e escribentas amarelas e, no verán, picanzos vermellos. En Loira (5) e na cola do encoro (6) son habituais os patos chupóns e cristados, os mergullóns cristados e as galiñolas negras. Algúns anos tamén se deixa ver o pato de colar e o rubio. Percorrendo outros recunchos da cola do encoro é posible detectar o bilurico alinegro e a espectacular aguia pescadora.
  5. Entre Vilaboa e Vilarrube (7) hai presenza de picafollas ibérico en primavera e verán, de pimpín do norte no inverno e de cardeal común todo o ano. Entre as dunas de Vilarrube (8) hai lavercas comúns, picas dos prados e algúns invernos, con algo de sorte, pódese avistar a escribenta lapona.
  6. Desde os cantís de Ladeira (9) ás veces é posible ver o merlo azul.

Roteiro en coche: Ferrol (enseada da Malata) - Cabo Prior

MELLOR ÉPOCA

Entre marzo e xuño

DISTANCIA

12 Km

DURACIÓN

Hora e media

DIFICULTADE

Ningunha

CONCELLOS

Ferrol

PERCORRIDO

Ferrol (enseada da Malata) - Doniños - San Xurxo da Mariña - illas Gabeiras - praia de San Xurxo - Cabo Prior

Lembra que pode haber recursos que non estean xeorreferenciados e, polo tanto, non os esteas visualizando.

Puntos clave da ruta:

  1. Desde a cidade de Ferrol realizamos unha primeira sesión de observación na enseada da Malata (1) para intentar rexistrar garzotas, gaivotóns reais e lavandeira mouras.
  2. Na lagoa de Doniños (2) imos poder anotar o mergullón pequeno, o rascón común e o picafollas ibérico.
  3. Máis ao norte, desde o castro litoral de Lobadiz (3) rexistraremos a carriza dos xuncos e as papuxa cabecinegra e papuxa do mato. Desde aquí imos ter unha visión moi interesante das illas Gabeiras, nas que existen exemplares nidificantes de paíño pequeno —difícil de detectar—, corvo mariño cristado e gaivota patiamarela.
  4. Na praia de San Xurxo (5) hai posibilidades de avistar gaivotas arxénteas e escuras, gaivotóns reais e carráns cristados. Na carriceira próxima, cun pouco de sorte, imos poder ver a subespecie endémica da escribenta das canaveiras. En verán, ademais hase poder ver a folosa das canaveiras e a dos xuncos.
  5. Por último, en Cabo Prior (6) poderemos contemplar o corvo mariño cristado, a papuxa cabecinegra e a choia de bico vermello.

Roteiro a pé ou en bici: lagoa da Frouxeira (Valdoviño)

MELLOR ÉPOCA

De outono a primavera

DISTANCIA

4 Km, só ida

DURACIÓN

3-4 horas a pé e 2-3 horas en bicicleta

DIFICULTADE

Baixa

CONCELLOS

Valdoviño

PERCORRIDO

Lagoa da Frouxeira (Valdoviño)

Lembra que pode haber recursos que non estean xeorreferenciados e, polo tanto, non os esteas visualizando.

Puntos clave da ruta:

  1. Trátase dun percorrido arredor da lagoa da Frouxeira, con varios puntos desde os que avistar un importante número de anátidas, garzas e galiñolas negras ao longo da marxe oriental. O máis relevante é o observatorio ornitolóxico (1).
  2. O bosque de ribeira (2) acolle multitude de especies, igual que os canavais que se encontran durante o percorrido.
  3. Na praia (3) imos poder ver limícolas (sobre todo pilros tridáctilos) e tamén, no inverno, escribentas das neves.
  4. Cómpre estar atentos ademais ao mar para observar varias especies de aves mariñas
As aves

Entre as aves máis salientables citaremos a escribenta das canaveiras, moi ameazada e con poboacións aínda significativas na Frouxeira e, ocasionalmente, en San Xurxo. O paíño pequeno e o corvo mariño cristado crían nas illas Gabeiras e a choia de bico vermello e a escribenta das neves fan acto de presenza nos cordóns dunares ata A Frouxeira. Nas Forcadas crían o mergullón cristado e a galiñola negra. En outono, con algo de sorte, habemos poder ver aquí aguias pescadoras. Na costa veciña nidifican o falcón peregrino e o merlo azul. Pero a xoia da coroa en Ferrolterra é a lagoa da Frouxeira, importante área para a invernada e o paso de anátidos, garzas e limícolas. Podemos gozar observando a poboación residente de pato frisado e mergullón pequeno e a recalada máis ou menos temporal de cullereiros e abetouros, este último moi raro noutros puntos de Galicia

Consellos e recursos
  • Para observar as aves acuáticas é recomendable o uso de telescopio

  • Débese estar atento nas zonas de cantís, moitas veces inseguras

  • A observación de aves en praias realizase moito mellor a primeira hora da mañá, pois a partir de media mañá a presenza de paseantes e cans soltos espanta as aves

Arriba