En novembro os bosques e as campiñas ofrecen toda unha paleta de ocres e amarelos: é o traxe de gala co que o outono dá a benvida a un bo números de especies invernantes procedentes do norte. O litoral tamén se inza destes novos visitantes: diversas especies de aves mariñas e acuáticas chegan ás nosas costas en novembro brindándonos a ocasión de realizar interesantes observacións. 

Unha vez máis, o noso destino principal vai ser o litoral

Nas zonas húmidas imos ver que ademais de limícolas, garzas e gaivotas, a medida que se achega o inverno gaña en importancia un novo grupo: os anátidos. Aos habituais lavancos súmanse as pequenas e veloces cercetas e os patos rabilongos, asubiadores comúns, chupóns, cristados e bastardos. Para observalos, son lugares excelentes as rías de Ribadeo e Foz, a de Ortigueira, a lagoa de Valdoviño en Ferrolterra, O Grove, a Ría de Vigo e A Guarda.

Lembra que pode haber recursos que non estean xeorreferenciados e, polo tanto, non os esteas visualizando.
Pilro tridáctilo (Calidris alba)
Pica dos prados (Anthus pratensis)
Virapedras (Arenaria interpres)
Carrán cristado (Thalasseus sandvicensis)
As aves acuáticas invernantes tamén comezan a asentarse nas zonas húmidas interiores

No intervalo duns poucos días, na lagoa de Cospeito e noutras zonas húmidas da Terra Chá podemos comprobar como se incrementan as cifras de patos e en especial de cercetas comúns. Outro bo punto de observación que non debemos desprezar son os encoros de Abegondo-Cecebre, da Fervenza e Baíñas e Vilagudín e Vilasenín.
 

O paso de aves mariñas en migración fronte aos cabos aínda é moi importante

De novo, Estaca de Bares, a punta do Roncudo na Costa da Morte e o Cabo Silleiro bríndannos excelentes oportunidades para observar centos de mascatos, pardelas encapuchadas, palleiras grandes, pentumeiros, carráns comúns e árticos, gaivotas tridáctilas, carolos e araos.

Tamén na costa imos ter a oportunidade de atopar aves terrestres menos frecuentes acabadas de chegar a Galicia, como a escribenta das neves e o esmerillón, unha diminuta ave rapaz con querenza polos espazos abertos. Cómpre estarmos atentos ás dunas, ás praias e ás áreas despexadas no litoral. Hai tramos da Costa da Morte, como o que vai do cabo Vilán á lagoa de Traba, que nunca decepcionan.

Certas especies, aínda sendo menos frecuentes, parece que incrementan a súa presenza neste mes respecto aos últimos anos

Un exemplo é o picafollas bilistado. Habemos atopar esta ave nunha gran variedade de lugares, pero a contorna da praia de Mar de Fóra, nas proximidades de Fisterra, en plena Costa da Morte, é o mellor.

No interior, a opción preferente para este mes é acudir ás áreas de campiña en busca de tordos reais, rubios e comúns, así como de pimpíns do norte. Na contorna dos ríos, nos bosques de ribeira poderemos atopar tamén os primeiros grupos de úbalos.

Non podes perder

Nov
Arriba